Biyernes Human sa Badlis

Matthew 9:14-15

Kagahapon gitagaan nato’g pagtagad ang kabililhon mahitungod sa paghimo og klarong desisyon sa pagsunod sa Ginoo. Naghatag ang Ginoo kanato og mga requirements unsaon pagsunod sama sa: pagdumili sa kaugalingon, pas-anon ang krus matag adlaw ug mosunod kaniya (Lk 9:22-25). Karon mao ang ikaduhang adlaw pagkahuman sa Miyerkules sa Badlis ug ang mga balasahon naghatag kanato’g klaro nga instruksyon unsaon pagpuasa ilabina ang unang pagbasa.

Ang pagpuasa usa sa tulo ka mga tradisyonal nga buluhaton sa mga Judio unsaon pagpakamahimong balaan. Bililhon ba gyud ang pagpuasa? Oo bililhon gayud ilabina kon kini himoon nga boluntaryo ug pagaubanan sa gugma. Ang pagpuasa dili lamang mahitungod sa pagkaon og usa ka beses sa panahon sa Miyerkules sa Badlis ug Biyernes Santo o dili kita mokaon og karne, kundili sumala pa ni propeta Isaias diha sa unang pagbasa (Is 58:1-9) nga aduna pa diay usa ka kahulogan niini nga dili para sa atong kaugalingon kundili para sa atong isigkatawo usab. Kini mao ang paghimo ngadto sa isigkatawo og mga butang maayo (works of mercy), sumala sa giingon sa atong Ginoo diha sa Iyang Sambingay mahitungod sa Katapusang Paghukom (Mt 25:35-36) sama sa: paghatag og pagkaon ngadto sa mga gigutom, paimnum ang mga giuhaw sa tubig, tagaan og balay ang mga walay puloy-anan, bistihan ang mga hubo, atimanon ang mga masakiton, bisitahan ang mga binilanggo, lingkawason ang mga dinaugdaug, pagbugto sa mga gapos sa sala ug daghan pa.

Si Kristo diha sa atong ebanghelyo karon nag-ingon: “Apan moabot ang panahon nga ang pamanhonon kuhaon gikan kanila ug magpuasa na unya sila,” (v. 15). Alang kanatong mga Katoliko, ang maong nindot nga panahon paghimo niining pagpuasa mao na kining Panahon sa Kwaresma. Makighiusa kita ni Cristo diha sa paghatag sa kaugalingon sa pagpangalagad ug pagsakripisyo alang sa pagtangtang sa higot sa yugo ug paghatag kalingkawasan sa mga dinaugdaug.